上海珍珍排骨麵 (已結業)

以為開o左「淮揚麵」會多一個選擇，點知都係唔駛揀，都係「珍珍」最掂。叫得上海珍珍排骨麵，排骨當然最耍家，排骨醃得入味之餘，炸得又香口，食落仲鬆軟，唔會炸到「乾憎憎」，更難得係即使浸腍o左，風味依舊，仍然可口。除o左排骨掂外，雲吞亦係強項，隻隻都好鮮味，所以首推「排骨雲吞麵」($28)。雖然係上海麵，麵都唔會太腍，仍然有咬口，正！另外，雞球、菜膽、冬菇，都係水準之作，可以逐樣試勻。唯一美中不足o既係店內無菜飯供應，只有白飯。而舖面亦較細，經常滿座，晏晝最好兩點後先去。