新澳咖啡餐室 (九龍灣工業中心) (已結業)

由於返工地點就係新澳樓上，所以由呢間分店開業至今已光顧早餐/晚飯不下十次。因為外賣自取速度都比較慢要等10-15分鐘，今朝見早早地就去新澳買個早餐外賣。每次外賣cashier短髮阿姐都會叫我地坐一陣等下至少要10分鐘，當我想坐低時有個阿姨同我講「外賣唔比坐，麻煩出去走廊等」。因為走廊經常有餐車出入位置比裡面更窄，加上今朝走廊有極惡臭嘅味道，我就搵個空位企，點知阿姨再係咁趕我地出去，態度極差。你連基本比人等外賣的位置都無，但又唔比人企係裡面，又唔比坐。老實講，我地叫外賣嘅人同堂食嘅人都同樣比一樣嘅錢，我見你仲有至少10個單人位又未有人等位所以先去坐，坐係度等並唔係恨坐你張櫈，係費事阻到你地做野，加上cashier阿姐叫我地坐先，而家仲比人趕咁款。買份早餐都要40蚊，比起附近餐廳嘅早餐定價貴，但外賣速度又比人慢，加埋員工態度差，已經無咩理由令我想再返黎。