店內的裝潢佈置好有泰式風情，而班服務員姐姐都係泰籍，加上一系列好正宗、好地道嘅菜式，令人好似身在泰國咁，即時relax晒~
講返食物質素，今次我哋四個人order咗大圓法包椰皇咖喱雞，香脆大圓法包內有乾坤，一打開見到充滿香濃咖喱汁，即時令人食指大動，細睇入面有個椰殼裝住滿滿嘅咖喱雞，咖喱汁入口盡是椰香，刺激食慾，而咖喱雞既入味又嫩滑，越食越開胃；至於附送嘅椰皇水飲落好清新，一濃一淡非常夾~
1
之後係咖喱炒蟹，大家都急不及待試試呢個極受歡迎嘅泰國名菜，切塊的紅蟹加入配菜、咖喱同香料炒香，完全能突出蟹肉嘅鮮味及彈性，獨特風味令人人都食到啜晒手指，回味無窮~
而海鮮炒粉絲鑊氣十足，入面嘅海鮮份量多，有彈牙爽口嘅蝦球、魷魚同蜆肉，粉絲仲索晒海鮮嘅精華添！粉絲要炒得乾身、入口煙韌認真唔容易，呢度就有返咁上下水準喇~
馬拉盞炒通菜幾乎係枱枱都會order嘅菜式，要將簡單嘅食材炮製到色香味俱全其實最考功夫，師傅就能夠保持到通菜的鮮綠，入口好惹味，鹹度適中，大家三扒兩撥就清晒成碟luu~
1
蠔餅大家可能食得多，鐵板蠔仔蛋就唔係人人食過，佢係好地道嘅泰菜，出面唔多地方食到。呢度嘅蠔仔整得好鮮味，一d腥味都無，而蛋嘅質感又厚又滑，大大啖咬落去，口感令人好滿足，加上用鐵板上枱，香氣四溢~
最後係鹽燒鰂魚，可能因為鰂魚入貨靚，所以簡簡單單鹽燒就能嘗到魚嘅鮮甜同原汁原味！切開入面啖啖肉，人人都食得好過癮~
整體嚟講食物相當出色，又唔收加一同小費，唔怪得有咁多紅星名人嚟幫襯啦，梗有佢原因嘅~
