淮揚夏日尊尚盛宴 （每位$988+10%）
江南四喜拼盤
賣相好精緻，四小碟包括花雕醉蝦、香檸醬油蟶子、四喜烤麩同糖醋小排骨。小編最推介蟶子，加入檸檬汁同醬油調製，鮮香惹味！
1
酸辣紅燒翅
紅燒翅以矜貴奢華嘅魚翅配上竹筍、冬菇絲同雞肉提鮮，相當足料！味道酸辣醒胃，做前菜一流。
蟹皇黃魚蒸雪裡紅肉餅
黃魚柳肉質細嫩，表面鋪滿以六月黃蟹肉同蟹膏炮製而成嘅蟹皇，味道鮮香濃郁，豐腴甘香。底層係肉餅，略嫌口感有點過於軟腍。
六月黃醬炒年糕（一隻）
六月黃肉質豐滿，仲好多蟹膏，蟹肉相當鮮甜，配上煙靭軟糯嘅六月黃鮮醬油醬炒年糕，鹹香十足，亦非常入味，小編極力推薦！
煙燻手撕雞拌海蜇
廚師先將三黃雞煙燻後再炸至外皮金黃酥脆，其後再將雞隻拆絲，製作工序繁複。
鮑魚小龍包
小龍包外皮夠薄，鮮肉餡料加入鮑魚粒，令湯汁呈現鮑魚鮮香，肉汁豐富，呢道菜亦令小編同朋友讚口不絕！
楊枝甘露小丸子
楊枝甘露以香甜當造嘅芒果加入西柚、西米、椰果同小丸子等配料，食落酸酸甜甜，都幾清新解膩。
