餐廳招牌菜火山排骨湯麵，以及多款人氣泰國船麵，湯底係熬製多個鐘，加上炸豬皮、牛肉、豬肉或雞肉等，泰式麵底可以選擇金邊粉、鴨蛋麵及米粉，唔錯。
火山排骨湯麵 $118
見到都令人視覺震撼！份量十足嘅排骨叠高成一座巨型火山，排骨以多個小時熬製，肉質細嫩入味，容易拆件方便進食，淋上酸辣醬汁，食落好開胃，湯底清甜唔口渴，每一啖都好香濃，配搭爽口嘅白蘿蔔，吸入排骨湯汁，好夠味，湯麵旁邊仲有滿滿嘅芫茜，非常濃郁美味。
清邁咖哩雞湯麵 $98
雞髀肉質嫩滑，鴨蛋麵條彈牙，咖哩湯底好重椰香味，雖然湯底紅噹噹，但一啲都唔會覺得辛辣，反而有陣甜辣香，好開胃，配埋大量芫荽同炸豬皮，食起黎更惹味。
茅椒荔枝蝦 $48
荔枝係夏天盛產季節，荔枝清甜多汁，蝦肉爽口彈牙，配合洋蔥、辣椒、乾蔥及泰式香料，微甜中帶少少辣，口感清爽。
黃金炸豬腩 $48
炸得金黃香脆嘅豬腩，肉質肥瘦均勻，食起嚟唔會好油，口感爽脆，滋味小食。
玫瑰荔枝梳打 $32
依杯玫瑰荔枝梳打，荔枝味濃郁，加入了好靚嘅花瓣，飲落非常清新開胃。
菠蘿粒粒梳打 $32
好清新嘅梳打，菠蘿香甜，粒粒爽口，炎熱天氣飮最適合，啖啖透心涼。
