樂川 (已結業)

有一次經開呢頭發現到呢間充滿食店嘅小行多咗一間舖叫樂川，今日心血來潮，決定試一試。入到去，雖然舖頭細細，但係麻雀雖小，五藏俱全。除咗有串燒小食之外，仲有麻辣燙，涼拌手工面等等，應有盡有。芥末涼拌魚皮，非常之爽，而且加咗芥末之後冇咁油膩，配合埋下便嘅芽菜，爽上加爽。涼拌青瓜，涼拌黑木耳。兩個調料都係同一類嘢，汁料唔會太鹹，恰到好處，黑木耳煮嘅時間啱啱好唔會太淋。酸菜魚麵，有得揀麵或者米線。酸菜魚唔算太辣，但係有魚湯嘅香味，配埋新鮮嘅魚片，可以話係一絕。羊肉串燒，燒茄子。有得揀辣度，今次揀咗少辣，羊肉香得來，仲有孜然粉，茄子生熟程度啱啱好！涼拌手工粉，原本以為係細細碗，點知原來係超大碗，搞到差啲食唔晒，呢一碗粉算係出邊食嘅同類食品之中叫做冇乜味精既，所以食多都唔會好重負擔，但亦都夠味，不錯！另外叫咗洛神花茶，裏面真係有洛神花喺度，真材實料！