孟買廚房 (已結業)

九龍城一向多好嘢食係人都知，除咗泰國菜出名之外，依間新開嘅印度菜都唔輸蝕。一入座會俾咗碟薄脆你先，都幾貼心，等緊上菜都有嘢食住先，不過薄脆都幾痴牙下，配上汁好食。串燒羊肉 $98因為用鐵板裝住，所以上枱嘅時候仲出緊煙。羊肉串好有印度香料味，下邊擺咗啲生菜絲，吸返羊串上面嘅油。香炸芝士球 $50可能係印度嘅做法，係用蛋包住芝士然後整成一塊塊，我覺得個口感似蛋餅多啲。辣咖喱蝦 $108用嘅係細隻嘅蝦仁，配上咖哩汁好惹味。芝士烤餅 $25試過就咁齋食個餅好有芝士味，類似淨芝士Pizza嘅感覺。芒果酸奶 $30係我鍾意嘅酸奶濃厚感，唔係好稀嘅感覺。芒果味幾重，有清新嘅感覺。密汁圓球 $30係印度嘅傳統甜品，係香港好少地方有得食。入面係椰絲，沾滿糖漿，好甜蜜蜜嘅感覺。