只係睇店舖名已經覺得好有意大利威尼斯風情，門上貼上彩繪玻璃圖案，美輪美奐。
餐廳裝潢設計充滿歐陸風情，除左牆上面掛滿多幅油畫之外，仲有一副歌劇面具同埋歐式吊燈，彷如置身於意大利餐廳一樣～🇮🇹
餐牌設計精美，一本menu有齊曬食物、飲品
同埋甜品，圖文並茂。食物包括多款漢堡、套餐等等，每一道菜都非常吸引。
經過一番苦思，我地不約而同挑選左漢堡套餐，每一款套餐都配以金黃香脆嘅薯條 🍔🍟
新鮮即炸既薯條外脆內軟，離遠已經聞到濃濃既薯香。咬開香脆既外皮，可以食到熱辣辣既薯蓉，薯仔味道濃郁 🥔😋
古代漢堡 Cauldron Burger $139
我點左一個古代漢堡combo，即係一個regular size 既漢堡配薯條。漢堡頂層麵包既口感鬆軟綿密，塗滿香滑牛油🧈，令人齒頰留香。
第一次食到呢款咁特別既漢堡，我諗「古代漢堡」呢個名稱係源自佢面頭嗰層獨特既青醬— Chimichurri Sauce，又名阿根廷青醬。
傳統既Chimichurri sauce 由parsley同埋oregano兩種香草作為主要材料，再加上紅蔥頭、蒜頭、紅或白酒醋同橄欖油調製而成，所以味道十分豐富，帶有酸嗆感 😝
我地將漢堡切成兩份享用🍔 除左品嚐到香濃既安格斯牛肉味道，生菜同蕃茄亦為漢堡帶來一點小清新。
和牛漢堡 Wagyu Burger $139
朋友點左最經典既和牛漢堡，同樣配以金黃鮮炸薯條🍟
雖然和牛漢堡既選料簡單，以和牛漢堡作為主軸，再以芝士、生菜同蕃茄作點綴，但呢個漢堡成功為我地帶來難以言喻既滿足感 😋
牛肉漢堡夾著生菜、蕃茄同芝士，重點當然係中間塊香煎和牛漢堡。整塊和牛漢堡分量十足，中心部分呈現半熟既粉紅色，肉質鮮嫩juicy，牛肉味香濃👍🏼
Chocolate banana gelato $56
難得去到一間Gelato 專門店，一定要試下佢地既自家製意大利雪糕🍦聽聞呢到既雪糕師傅手藝非凡，而且堅持選用最高品質既水果作為gelato 既原料。
呢客gelato既香蕉味特出🍌，食落香甜細滑，再配合埋朱古力微微既苦澀味，甜而不膩。Gelato 比一般雪糕清新，脂肪含量較低，但口感更綿密 😚
當晚真係好滿足，連嘴刁既朋友都大讚好食。餐廳店員既態度親切，又適時為我地提供餐牌同水，係一個完滿既美食體驗。
