馬祖 (將軍澳廣場) (已結業)

之前成日都經過，今日終於都食到，質素好高而且比想像中多野食，呢個價錢黎講好抵食!我地揀咗$223個餐，可以食埋牛同豬!肉類質素幾好而且都冇咩筋，但實在有太多野食，每款食少少都已經飽左!最特別係佢呢到有好多款特式既台灣火鍋配料，包括甜不辣、台灣腸同埋仲有個勁足料既芋頭貢丸。其實仲有好多款不過實在食唔落。整體配料都好新鮮唔似係雪左好耐既貨。仲有芫荽燒賣，咁樣加落去食味道又幾好，索到湯汁又唔韌!另外仲有雞腿肉，真心好少會係火鍋店食到好食既雞腿，佢呢度既冇雪過基本上淥4分鐘已經食得，肉質好嫩滑而且冇咩肥膏!佢既金沙魚蛋第一次食，咸蛋味好突出而且真係有流心既狀態。食到尾佢既甜品選擇都好多，竟然仲有兩款movenpick雪糕、脆皮雪條、甜筒等等。我地就食左個熊仔雪條，幾得意又可以清一清油膩。今餐飯真係好滿足而且性價比十分高!