Twinkle Baker Decor (已結業)

一直都覺得呢間扮清糕d蛋糕整得超精緻，之前試過一個超特別既珍寶珠扭蛋機造型同聖誕主題既藍色雪花蛋糕，印象深刻。另一半係情人節個日唔得閒，於是打算買個靚靚蛋糕提早慶祝。慶祝情人節實係揀冧爆你系列啦！呢個系列既全部蛋糕都係粉紅色為主，走少女浪漫風，而家疫情冇得去日本賞櫻，就揀呢個樱花樹下啦！樱花樹下 $388 4.5 吋蛋糕造型甜美，以粉紅色為主，加d紅色，深粉紅同白色營造唔同層次感。上面有8支棒棒糖，當中有4支朱古力同4支棉花糖，造型係花花同波波。蛋糕身有好多用朱古力造既花仔同珍珠粒，造得好精緻。蛋糕放好左係一個好厚好實净既紙盒入面，蛋糕返到屋企完全無移位。隨盒附上一把刀同一支蠟燭。蛋糕面皮少少黏黏地，唔甜。切開個蛋糕，入面有3層原味海綿蛋糕夾住兩層白桃慕絲同一d白桃果肉。因爲白桃慕絲既關係，呢個蛋糕食落一d都唔乾，非常濕潤，有好香甜同好滑既白桃果味，食落仲有d爽爽地既白桃果肉。呢個樱花樹下蛋糕精緻又好食，分量足夠6-8人分，用黎幾個人一齊慶祝情人節都唔錯。