金翠餐廳 (已搬遷) 新店位置

下午茶時段，本來想襯人少去金鳳鋸扒，行過呢間叫金翠嘅餐廳，門外標榜係金鳳前員工所開嘅餐廳，一樣有蘇格蘭牛扒，標價$90 。由於我自己本身都好耐冇去過金鳳，唔知道而家係乜嘢價錢，但係覺得$90呢個價其實都唔算太便宜，但抱住一個比較嘅心態，即管入去試一試。一份蘇格蘭牛扒，加蒜蓉要加兩蚊，有餐茶有餐包有餐湯。味道同金鳳差唔多，但係嗰兩塊所謂牛扒非常之細塊，而且仲係唔係完整一塊，而係分開兩細塊。淨係呢一樣嘢已經非常失望。薯條椰菜蘿蔔同牛扒嘅比例大約係一比一。可能而家經營真係好困難，埋單$94,但係應該唔會再回頭幫襯。