吃吧 (僑建大廈) (已結業)

香港小店難生存，旺角小店就更加難生存，好多都向樓上發展。而以前樓上舖俾人嘅印象大都係重視環境，嘢食都只係屬於煮家級，但原來而家好多樓上舖都好有水準，就好似呢間咁。意粉薄餅呢啲基本嘢有係好正常，但慢煮和牛面頰呢啲就真係幾罕見，經慢煮質感同牛脷幾相似，但牛味就濃好多，加上用甜酒燴同埋個汁帶酸，食落唔會好易膩，而個薯蓉都有陣微微嘅煙燻味，味道唔會單調。另一個主菜海鮮飯都好有驚喜，除咗原條魷魚之外仲有巨型帶子帆立貝同埋蝦等，樣樣海鮮都好新鮮，個飯底又加咗幾多香草好惹味，最出色係條魷魚燒得剛剛好，好有彈性冇一個位係過硬。而前菜招牌拼盤都有花心思，放哂乾冰視覺效果夠哂滿足，最鍾意係蟹肉牛油果，上面仲加埋海葡萄增加口感，而鵝肝酥盒都好有心思。餐飲方面招牌梳打係即場打汽，另外仲有啲生果切到半圓形一粒咁，呢啲細緻位都好值得欣賞，就連朋友飲果款手工啤都係香港製造，好有心。