黑布小巷

营业中

休息中

今日同朋友去荔枝角行市集，仲試咗一直想試好耐嘅黑布小巷。前排喺IG見到好多人推薦，今日一於嚟食午餐！蕃茄紅燒台式牛肉麵 $88牛肉麵大大碗，同出邊唔同嘅係佢加咗蕃茄。紅燒湯底本身就頗惹味，再加上蕃茄味，酸酸甜甜，更出色。另外仲有牛肋條、蘿蔔、蕃茄、青菜同滷蛋依啲材料。牛肋條好軟淋，份量多。蘿蔔入味香甜，滷蛋都好入味。慢烤雞腿芝士蛋吐司 $56吐司賣相好吸引。麵包有稍為烘過，帶點點脆。雞肉肉質嫩滑juicy。另外，因為係提供荷包蛋，所以蛋汁會流到麵包皮內，非常美味。芝士火腿蛋餅 $38所有材料都好夾，蛋餅夾住蔥煎蛋同煎過嘅火腿，食落特別香口。芝士都有好多，而且溶溶地，好正。芋頭椰汁三色圓（凍）$46糖水大大碗！芋頭椰汁就好似冇西米嘅芋頭西米露，食落芋頭味濃芋，帶點濃稠。芋圓較大粒，粒粒都好煙韌彈牙。我最鍾意蕃薯味，食落最煙韌，而且蕃薯味好出。自家煲制冬瓜茶（少甜）$22冬瓜茶只提供少甜版本，相對上較健康，飲落清甜。桂花雪梨羅漢果茶 $32依款飲品有清肺潤喉、止咳化痰嘅功效。羅漢果甘甘甜甜，好好飲。