海岸餐廳燒烤樂園 (已結業)

尋日, 我同男朋友兩個人夜晚去呢間"所謂"餐廳BBQ,諗住每人$88有海鮮食都ok啦, 掂知一到步就發現賴晒野。唔掂一：侍應態度奇差。找錢找少十蚊當無回事，叫佢拎橙汁又拎左忌廉，仲同我講：小姐，呢度任飲既，飲完忌廉先啦，我堅持唔肯就範，佢先肯換俾我。仲有，個個侍應都當左你係佢殺父仇人咁，個個都黑口黑面，同佢講完要乜野佢好似唔想做咁。不但只係咁樣，佢地個個都成日爆粗，我真係從來都無見過咁既侍應囉。唔掂二：食物同飲品選擇極少：任飲既只有可樂、橙汁同忌廉，仲要係一揸揸上，仲要係無氣既，真係慘過飲水，我見有幾台人用$5買水飲。野食又係極唔得，話就話有海鮮，但係只係得個身得5蚊銀咁大既蟹仔同半隻手掌咁長既瀨尿蝦，又無肉又梅，其他食物只係得20款左右，仲要好多係重覆既，d扒又係“原汁原味”完全無調味，其他食物亦都唔得。唔掂三：樣樣野都要收錢。話就話俾人燒四個鐘，但係只係包一小包既炭，我地兩個人燒都唔夠，買一包又要15蚊，其他錫紙、燒烤網都要用錢買。唔掂四：個爐太高，好難燒。環境好迫，好似集中營咁，既睇唔到所謂既海景，d 簷蓬仲好矮，總之就食得好唔舒服。