元朗花甲粉 (已結業)

元朗花甲粉以外賣為主，店面只有4個座位。6點開晚市，當日6點15分到，雖然堂食暫時冇人，不過老闆話外賣單較多，堂食都要等到7點。咁難得入元朗，點到等到7點啦！7點入座，不過老闆娘都話要等到7點15分，於是就點餐先，坐到7點15分接單，等咗陣好快就有得食，期間聽到外賣電話響個不停，不過外賣都要等超過一小時，見咁受歡迎，都可以肯定唔會難食得去邊。因為我揀咗小辣，老闆娘特地提醒佢哋嘅小辣都好勁，問要唔要轉bb辣，自問平時都食到中辣，以為冇問題，點知都係少年太年輕了，元朗花甲粉的小辣同其他米線餐廳的中辣有過之而無不及。一入口最先反應係喉嚨，冷不防被嗆了幾下。湯底偏甜辣，娃娃菜、豆卜吸收哂辣油味道，非常入味，雖然都幾辣，不過都係忍唔住飲多幾啖湯。今次叫花甲粉，花甲同粉絲份量非常多，大概1.5人份，另外亦提供不同種類的麵，粗米線都有啲想試，不過第一次都係食返粉絲經典啲。不過今次啲花甲有啲瘦，好在冇沙同清甜。涼拌蓮藕份量都好多，切成薄片，所以特別爽脆，芝麻醬、陳醋調味，非常開胃，亦幫助解辣。下次有機會入元朗都想再幫襯。