太興 (已結業)

今日山長水遠去大角咀開會，呢度除左識奧海城之外，真係唔太熟呢頭，行下行下見到呢個新九龍廣場入面，有間我食開既飯堂，就係太興啦，咁當然要食個飯先啦。估唔到係呢個地方，人流絕對唔少，入面都係坐滿晒人，好辛苦逼到個位，地方唔算太闊落，不過環境都算舒服。之後就梗係要叫我最鐘意食既飯款之一啦，就係咖哩牛腩飯啦~ 因為午市關係，所以都要等左一陣。終於上枱啦~ 上枱啦~ 首先好快就上左杯凍檸水，呢杯太興凍檸水基本上係我覺得係最抵飲既，因為佢都真係好大杯，而且都有成四塊檸檬，比較出面你話邊有咁多啊~ 好啦，跟住主菜到咖哩牛腩飯啦，首先講一講佢個咖哩汁先，有好香濃既椰香，而的汁亦唔會好杰身，又唔會太辣，加上佢個的薯仔係用炸過後既薯皮，食起上黎都好香口，但當然牛腩先係主角啦，呢度既牛腩份量都好多，牛腩同牛筋個比例相若，牛腩好嫩滑又入味，味道豐富，送飯真係一流。 埋單都要$61蚊，午飯黎講價錢都算中等啦，不過從味道上欣賞，就真係值得讚既。