大街小館 (已結業)

今日同朋友去佐敦行街，朋友話有間叫「大街小館」嘅隱世糖水舖好好食，所以特意嚟支持一下。我哋四點左右嚟到呢間小店，可能因為係平日嘅關係，所以唔使等位就可以馬上坐低，不過當時都已經接近滿座。餐牌上除咗一啲普通嘅甜品之外，值得一提佢哋有自家做嘅雪糕，仲可以配合唔同嘅甜品一齊食。我哋點左三款甜品，分別係椰皇蛋白燉桃膠、芒果拿破崙配黑糖奶茶雪糕同椰汁湯圓。椰皇蛋白燉桃膠，服務員端上嘅時候馬上聞到濃郁嘅椰香，上面鋪上金黃色嘅桃膠，淨係賣相已經有90分。燉蛋白非常嫰滑，配合濃郁嘅椰汁再加上西米同桃膠，真係非常滋補養顏。芒果拿破崙係即叫即做，大家睇吓幅相係咪好靚呢，食落口非常有驚喜！老闆為咗保持質量，用咗新鮮芒果肉去做呢個拿破崙，而餅底更加係熱辣辣同埋入口鬆化，絕對可以媲美好多大酒店嘅出品。最後就係椰汁湯圓。原來兩者配合係十分好味，口感滑順不會過於甜膩。