麗島小廚 (已結業)

今晚喺呢間雞煲店揀咗椰子雞煲，滋潤好味道，湯底嚟嘅時候雞同埋湯分開上，湯底滾起咗先至落雞，兩個人叫半隻啱啱好。另外侍應姐姐會幫我哋成個椰青車落個湯底度好震撼。湯底滾起 咗之後5-6分鐘左右啲雞就食得，又鮮味又滑。題外話，呢支德國麥啤幾好飲。個雞煲食到七七八八之後就開始打邊爐，我哋叫咗碟細嘅安格斯牛肉，好新鮮好靚，淥一淥就食得。佢個蝦滑都好新鮮好彈牙㗎。另外我哋仲叫咗芋頭片同埋菜，兩個人食都真係幾飽，呢度啲份量都幾足，真係一餐豐富嘅晚餐。