小越廚

营业中

休息中

星期日同男朋友去完大帽山睇日落，順便係荃灣食Dinner，見小越廚嘅食評唔錯就一於試下啦！夜晚七點鬆啲去到餐廳，剛好有卡位，唔使等，Lucky！我又選擇困難症發作，問職員妹妹有乜推介，佢話蟹膏湯檬同咖哩蟹肉飯好味，我地就叫咗蟹膏湯檬。自從去完峴港，我就對越式法包上曬癮，呢度好多唔同口味嘅法包，第一次就試下最original嘅越式法包啦，$38好抵食！另外我地再叫咗米紙蝦卷同蔗蝦，全部食物加埋唔過二百蚊，好平！蟹膏湯檬最快上檯，一望就知佢好足料，湯底清甜有啲似龍蝦湯嘅味，唔錯啵。越式法包同樣足料，好多餡，法包外脆內軟，味道同係越南食嘅好似，正宗！米紙卷入面包咗好多菜，隻蝦咬落爽口夠新鮮。最遲到嘅蔗蝦更加有驚喜，唔同一般只係好似魚片咁嘅口感，而係保留咗原粒嘅蝦肉，好彈牙，yummy！值得一讚嘅係，除咗食物水準高之外，小越廚整體乾淨企理，坐得舒服，同埋有柔和背景音樂。我地呢完呢餐都覺得好幸福，男朋友仲話可以當呢度係荃灣區飯堂啦！佢地做得好平，應該賺得唔多，大家都多多支持呢間小店啦。