明閣 (鷹君中心)

第一次嚟明閣就試吓佢哋嘅套餐，Around $900 就食到原價$1388嘅嘢，都算物超所值，唔怪得環顧四周，大部份都係嗌呢個東方美人養顏套餐。
最記得佢哋嗰個龍躉球係用紅棗杞子去蒸，好嫩滑同埋好入味，底部嘅粉絲索晒啲精華。仲有個雲腿配翠玉瓜，一般嘅雲腿都係又咸又乾爭爭嘅，呢個竟然出奇地嫩滑同埋有啲甜味。個脆皮花膠都好特別，高級嘅食材配上特別嘅煮法帶來出色嘅味道和口感，不得不讚吓個大廚！頭盤嗰個柚皮同埋車厘茄都有意想不到清新嘅感覺！講到養顏點少得蟹肉燕窩羹。成餐飯食嘅速度有啲似食法國菜，加上高雅裝修環境配合，食完溫和得嚟又好舒服，有一股由內而外散發出嚟嘅美·味。