一起果醬 (已搬遷) 新店位置

約咗4同事去行東霸，出發前先醫肚，同事早一日已經提議去一起果醬到食早餐，仲超快速地訂埋枱（返工做野平時效率係無咁快架😆）其實初初睇到個餐牌都有少少打個突...因為我心諗...我食個早餐啫，原本只係諗全餐蛋麵就算，而家個價錢變咗Double，但對比出面食個All day breakfast又真係抵食，最後我就叫咗Classic all day breakfast 轉左英或鬆餅再配我最愛嘅芒果醬。先講一講我食野嘅習慣先，由細到大我係先食咗嗰餐最唔好食嘅野先到最喜愛嘅野食。份早餐送到黎我見到咁大個蕃茄，依照我食野次序，所以係先食咗個蕃茄先。但竟然最大驚喜係個蕃茄！入口超Juice！從來都無食過咁爆汁嘅蕃茄，超新鮮！之後再食我一向麻麻地嘅煙肉，但呢到嘅煙肉令我對佢改觀，煎到好香口但唔會硬，好味！食哂雞蛋、腸仔蕃茄豆、蘑菇之後，就到今餐我最愛嘅主角，英式鬆餅配芒果醬！將鬆餅搽咗少少芒果醬再一啖食，有芒果肉，超美味，食到想即刻買樽芒果醬返屋企食！每一款果醬都好好味，不過我個人口味最愛是芒果！同事果然無介紹錯！