等位果陣順便睇下佢個餐牌，發覺都唔算貴，20幾蚊就有得食4隻吉列蠔啦，但係每人平均消費要80蚊又唔用得會員卡有啲失落
坐等之後都考慮左好耐要叫咩，一來擔心會中伏，二來食開放題細細份唔知宜家散叫有幾大份，餐牌又無圖片。最後我地三個人就叫左三文魚芒果卷，醬燒三文魚腩加州卷 ，泡菜雞肉鍋，鰻魚炒飯，海鮮拉麵，吉列炸蠔同三文魚頭。
唔洗二十分鐘啲料理已經陸續上枱
最先黎嘅就係泡菜鍋
估唔到係未煮嘅同埋都幾大份下有成半鍋雞肉都係賣46蚊，計晚市尼講叫幾抵食下
未熟
啲雞肉煮完都好嫩又唔肥，啲菜都算新鮮
仲吸收曬啲湯汁。個湯嘅味道就偏甜帶微辣，怕辣者都應該可以接受到無難度，不過如果可以酸返少少就好啦，總算足料幾惹味
燒三文魚頭燒得岩岩好
啲肉好嫩滑，咸咸香香仲有汁好濕潤，唔會燒到乾曬，加埋檸檬汁酸酸地真係好夾！三文魚頭仲俾埋個鮫位都好滑好稔，真係好好食，送啤酒一流都係賣27蚊咋
鰻魚炒飯真係好香燒汁味，上枱果陣仲有隻生蛋黃俾你撈埋尼食，個飯入面仲有粟米，生菜同鰻魚粒，每啖都食到嫩滑嘅鰻魚粒又唔腥真係好滿足，唯一係個飯炒得有啲濕，乾身啲會好啲
49蚊咁大碟都唔算貴
海鮮拉麵都唔野少
啲帆立貝青口都大大隻仲唔會有沙仲好鮮甜，唯獨隻蝦嘅賣相一般，啲麵嘅軟硬程式又岩，好爽口彈牙，成碗麵嘅質素瞬間提升，個湯飲完都唔口渴，雲耳仲好脆好爽口44蚊大大碗，正呀！
炸蠔啲炸粉好薄唔會成口粉，食落鬆化可口仲有蠔汁流出尼，隻蠔仲好肥美唔會係蠔‘毛’，二十幾蚊食到咁嘅質素真心抵呀
醬燒三文魚腩加州卷係全晚最好食嘅卷物之一，輔滿被燒過，流住魚油嘅三文魚腩真係好creamy肥美，上面仲有蟹子卜卜脆加強口感，配加州卷真係中和返一啲都唔滯
好好食一定返轉頭再食，事關得尼度先有得食好有特色
最後係三文魚芒果卷，生果同魚生好似格格不入，但係三文魚加芒果真係好襯，芒果嘅酸甜味豐富左三文魚嘅鮮甜，當日啲三文魚仲要好厚好肥美，二十幾蚊抵食啦
哈哈尼餐真係好滿足！每個人都係食左80蚊左右就已經可以食到咁多款美食仲唔會有份量不足嘅問題，啲服務仲好好會問你尼齊啲野未同問你岩唔岩食，叫錯左仲即刻去追單，香港已經好少有咁好服務態度嘅餐廳
所以我一定會再尼幫襯架，今次令我再次愛上光臨尼間餐廳
