兩興潮州海鮮飯店 (已結業)

久仰兩興大名,前兩日老細請食午飯就黎左呢度,聽同事講呢度午飯時間非常爆場,一定要早的訂位咁話.十二個人都叫左好多野食,鹵水鵝,蠔餅,蠔仔粥,川椒雞,椒鹽白飯魚梗係唔少得,鵝片好味又夠瘦,但啲墨魚片就冇乜味同埋點解係黃黃地色唔係橙色既?蠔仔粥非常美味又足料,蠔仔大大隻,川椒雞亦相當有水準,完全將美心係潮州酒樓比下去,係個蠔餅差啲,唔脆又油,最後都冇食晒. 另外仲叫左白菜仔煲,菜心炒牛肉同炒魚麵,魚麵我覺得好食過樂園,最意外係個菜心炒牛肉超美味,牛肉嫩菜心爽加埋個薄薄沙爹汁簡直超水準!!!之後叫左個水晶包做甜品,一半係蓮蓉餡一半係荳沙,新鮮蒸起熱辣辣,個皮少少煙韌啲餡又出奇地唔太甜,掂呀!最後仲有一大窩綠豆爽做甜品,清甜美味係嫌清水丸少左啲.可能我老細係熟客,侍應招呼好好之餘埋單時個水晶包同糖水都冇計錢,最後我見張單都係五百七十幾,以咁高水準既食物黎講我覺得超值!順帶一提,呢度碟頭比較大,最啱都係一大班人黎開飯,一定有下次呀!