一幻拉麵 (已結業)

中環街市啱啱開番，行完本身想喺入面嘅餐廳食，不過真係太多人，決定去附近搵嘢食。見到一幻係附近，即刻行過去。一幻拉麵之前喺尖沙嘴食過，當時主要係俾個海景吸引咗，不過上次食拌麵，湯底好濃厚 ，開頭幾啖好重蝦味覺得好好食，不過去到尾段已經覺得到有滯，心諗下次一定要叫湯麵。今次叫咗蝦湯拉麵加多蔥（+$10）同Sapporo啤酒，拉麵揀咗比較硬嘅質地。蝦湯依然濃郁，掛湯拉麵，半隻糖心蛋，叉燒，粟米，蝦酥再加上一啖啤酒，正，如果可以加多一塊紫菜就更好😂。拉麵的份量比較多，同行的朋友食唔晒，亦都見到隔離枱兩個女仔會叫一個麵加底再加小食，當中嘅餃子好似都好唔錯。我就食量一向大啲，所以叫多咗個蝦味團，不過比較失色，只係淨飯團，原來冇餡，有味飯的蝦味唔夠突出，都係蝦湯拉麵出色啲。下次再食會叫番蝦湯麵同試埋佢個餃子。