雲吞仔 (已結業)

是日到花墟買花，買完梗係要醫肚，一個人想簡簡單單食碗麵，來到了「雲吞仔」。餐廳裝潢好有舊式雲吞麵舖感覺，入面有好多香港嘅舊相，非常有本土風味。餐牌簡單易明，有唔同套餐可以揀，另外仲有一款麵叫包羅萬有，足足有12款餸都幾吸引，但始終都係想食多幾粒雲吞，所以最後都係揀咗個三拚套餐。三款餸揀咗雲吞、牛腩及牛筋配河粉，三款餸份量都幾多，餐廳叫得雲吞仔，就梗係要試下佢d雲吞，雲吞皮薄餡足，蝦夠彈牙，同豬肉嘅比例剛剛好；牛腩同牛筋都炆得夠淋，仲好入味，配埋秘製辣椒油份外惹味。套餐可以揀油菜/魚皮或紫菜，要咗個白灼菜心，上枱時仲好翠綠，食落味道鮮甜，一d都唔老。最後加咗5蚊要杯凍豆漿，豆味香濃，味道唔太甜。