The Night Market (又一城) (已結業)

D friend話The Night Market 喺又一城開咗，想去試吓，咁今晚就嚟試吓佢嘅台湾美食喇。打開餐牌一睇，林林總總，真係有好多款台式地道小食，好似好吸引咁。先嚟個炸蚵仔酥同蚵仔大腸麵線。熱辣辣蚵仔係炸得外脆內軟，但唔知師傳係咪一時失，落咗好多鹽，鹹到食唔到，冇辦法之下，只得叫侍應嚟拎走佢，佢哋服務都唔錯，話會换過一碟畀我哋嘅跟住上枱係蚵仔大腸麵線，賣相不俗，但份量比預期中少，而且味道偏…鹹。唔知發生咩事，两個菜都出咗問題，第一印象已經打晒折扣。再上係鴨紅腸旺同三杯鷄。酸酸辣辣夠晒惹味。用石鍋上嘅三杯鷄，味道調校得幾好，不過鷄肉太乾身，食落嚡口。再嚟過烏魚子炒飯，烏魚子嘅鹹香同炒飯好配。最後整多碟新竹炒米粉，不過不失，平平無奇。香港以台式美食作主打嘅食肆有好多，如果唔提升食物嘅質素，就冇再次幫襯嘅理由。