店面裝修正常，未算精緻又未算完全簡陋。不過明顯店面空間所限，坐得比較逼夾。可能我比較少食宜蘭菜，所以店面上張貼咗好多講解令下單少好多煩惱
今晚晚餐冇叫主食，反而叫咗幾樣網民熱捧嘅：
芋見紫薯多士 $45
全晚最期待，但亦係最失望。麵包比較乾身，好似放咗好耐咁樣。而更重要嘅係不論係芋泥抑或紫薯，都食唔出芋頭/紫薯嘅香味、甜味，令到呢個多士變成一個乾爭爭、又冇乜味嘅麵包。最後我都係堅持唔到食完佢
仙草芋圓2號（三色芋圓、白色小丸子、海燥水晶）$35
用料豐富，對得住價錢。但同芋見紫薯多士一樣，三色芋圓口感、味道相似，比起其更出色嘅芋圓大有人在
羅東肉焿湯 $47
作為鎮店之寶，梗係要試吓啦。店舖亦都好貼心，有張貼告示作專門講解咩黎、食用方法。湯飲落係好重豬骨味，一讚。但肉質感覺鬆散，有啲梅梅地嘅口感。可能呢碗野係我唔識欣賞，覺得有啲名大於實
古早冬瓜茶 $15
正常嘢冇伏冇驚喜
其實都唔知係宜蘭唔啱我食，定係舖頭水準飄忽。所以今次有啲大失所望，有名大於實嘅感覺。如果每次都要等半個鐘先食到，就未必會再幫襯
