add@Prince (裝修中)

因為某個原因，老公有這酒店既會員卡，並且有買4送2既 coupon，於是乎約左四大長老一齊嚟呢度開餐聚下。自助晚餐6:30開始，食物分刺身﹑即開生蠔區﹑芝士凍肉區﹑凍海鮮區﹑沙律區﹑印度美食區﹑泰式美食區﹑即煮麵檔及少量熱葷，亦有燒肉眼扒等，當然唔少得甜品區啦！其實食物款式雖未至於好多，但如果你乜都食，真係OK架！奈何我倆的父母唔係唔食牛羊，就係唔食凍海鮮﹑生冷野，而呢度既熱葷確實極少，是晚得羊架﹑燒沙甸魚﹑菜膽雞﹑唔知咩焗雞﹑咕嚕肉同京都骨(最後兩者係先後出場)，炸生蠔叫做特別啲，但奶奶話味道麻麻，佢可是食開流浮山新鮮貨的！另外佢有即煮龍蝦，但好隱蔽下，差點發現佢唔倒... 但到我地去攞時已得番殼了，冇乜肉，所以長輩感覺冇乜野食。正常價錢係$438加一，如果正價食上面既野，確係有點貴，但而家用左coupon及會員七五折，6個成人埋單都係$1500有找，即每人$250唔駛，咁就抵番哂了！