睿私房菜

营业中

休息中

飲茶明明係件悠閒事，但香港人忙忙碌碌，到週末飲個茶都要排隊人迫人。不過有更「私房」嘅嘆茶選擇，以上問題就唔再係問題。#睿私房菜 係一間糅合新派菜 X 傳統古法功夫菜嘅廣東私房菜館。午市唔想咁heavy大可一戰佢嘅手工點心，全部都係師傅人手逐件搓揉而成。望住個跑馬地馬場全景呷一口清茶，正！一個嘆茶，更要鎮選，試到最想食嘅之餘又可以測試師傳手勢。最後我選擇咗蒸點、炸點都各叫一款，再配以甜品。「蒸」/ 翡翠帶子燒賣 /手工點心感覺零舍專貴，翠綠嘅燒賣皮包住大大甩帶子，好似一道䄂珍版嘅荷塘美景咁/ 芹香金魚餃 /造型十分可愛，金魚餃變成池中物咁喺水中嬉皮暢泳！味道方面芹菜鮮甜，餃子皮薄多饀好足料！「炸」/ 黑椒和牛鵝肝酥 /食神教路，飲茶想試真功夫一定要點一個炸點！講造型個 #黑椒和牛鵝肝酥 一樣係靚到冇得輸，中式嘅千層酥皮鬆有層次，內餡嘅黑椒和牛鵝肝係絕配組合，牛香同油脂滲到酥皮內層，稍為有啲罪惡感但味道真係100分！「甜」/ 糖心安納芋蕃薯酥 見餐廳嘅炸品相當出色，於是甜品亦揀咗 #糖心安納芋蕃薯酥，外皮今次係偏似曲奇皮嘅酥脆，蕃薯蓉甜味天然，有少少顆粒更能突顯其手工感。