塚田農場 (已結業)

真係大鄉里，幫襯過呢間日本餐廳的Lunch，今次食晚飯先知道原來佢哋主要係食火鍋嘅，但係因為尋晚先同friend打完邊爐，於是就叫咗d非火鍋類型嘅野食。我哋兩個人叫咗5樣嘢，三文魚刺身、吞拿魚刺身、海老天婦羅壽司卷、三文魚蟹肉沙律壽司卷同埋沖繩大島魷魚配豬肉炒麵。完全冇諗過個炒麵會成為第一度上枱嘅菜式，個炒麵幾好食，最正係d魷魚，雖然已經切咗粒而且都係得幾粒，不過單憑呢幾粒野可以想像到條大島魷魚都應該幾大條，好有咬口。兩個壽司卷之中開頭仲以為個三文魚蟹肉沙律壽司卷會好食啲，點知結果相反地係個海老天婦羅壽司卷好味d。個海老天婦羅就真係炸得樣衰d，你睇吓幅相入面個蝦尾嘅粉厚成咁你就知啦，不過好彩食落又唔錯，壽司卷切件後細細件，食落都幾新鮮。三文魚蟹肉沙律中，蟹肉沙律嘅味度就蓋過晒三文魚，所以似就咁蟹肉壽司卷多d，不過佢個樣又真係幾靚嘅。刺身就普普通通啦，新鮮嘅，個吞拿魚刺身嘅質素又ok woo，無渣，收貨啦。最後想講呢間野嘅侍應好有禮貌(唔係必然架)，服務好好，值得一讚。