同撈同煲

营业中

休息中

九龍城除咗食泰國菜之外，其實仲有其他好選擇，今次就嚟咗呢邊打邊爐，係一間充滿懷舊味道嘅火鍋店。裝修方面，好似去咗七八年代嘅香港，坐低之後店員就向我哋推介時令海鮮，都幾抵食，但由於朋友對海鮮有啲敏感，所以就冇食。湯底方面，我哋揀咗少爺雞煲翅 $398。湯底好快就已經送上，有半隻雞、魚翅竹笙，同埋大量嘅冬瓜，店舖仲好貼心將啲魚翅隔開，方便客人食，仲會幫我哋即場將啲雞切件，好貼心服務好好。 滾咗之後，首先可以飲咗個湯先，無論係雞本身定係湯，都好有雞味，雞肉夠滑，再加上魚翅冬瓜等等嘅材料，令到成個湯底香得來又帶點清甜，真係好好飲，店員仲會keep住幫我哋隔雞油，所以飲落去嘅湯唔會太過油膩。之後我哋就嗌咗啲配料打邊爐，包括係黑豚肉，四寶餃、芝士蝦丸、芝士牛丸。值得一讚係佢哋嘅丸類全部都係手打自家製，同平時食開嘅芝士牛丸完全唔一樣，感覺真係用咗真牛肉去整，芝士蝦丸，亦都有濃濃嘅蝦味，配埋溶咗嘅芝士，真係非常好味。另外，我哋仲嗌左幾款小食，老友鬼鬼同埋雞軟骨，好脆嘅油炸鬼包住蝦餃，口感好好👍雞軟骨，亦都炸到脆卜卜。食完之後到最後仲有甜品，啫喱同埋糖不甩，呢餐真係好飽好飽，亦都好滿意。