大當家粵皇食府 (已結業)

我上網睇食評見口碑唔錯，於是約埋班friend係度食晚飯。7點鐘到，一坐低，D侍應係咁叫你點套餐，千幾蚊，冇睬佢地。8個女仔叫了6個小菜、一個窩麵、一碗担担麵。其中兩個餸特價$108 - 虾 + 炆班腩，虾大約有一斤，都算正常，但係碟班腩只見豆腐加兩三塊冇肉o既魚，變左108蚊食斤骨同豆腐，你話抵唔抵。重有個炒帶子，真係一人得一啖。因為唔嗅米氣，所以order麵食，個侍應介紹個窩麵，除左麵得幾隻冬菇同幾條菜，埋單都唔記得睇幾多錢。至於担担麵，係酒樓食呢類嘢，水準如何，大家可以想像得到。不過個鎮江骨同三杯雞味道唔，加番少少分。間餐廳裝修幾新淨唔錯，但係d 檯擺得非常近。當晚人多，噪音有成80分貝。至於服務方面，D侍應係見唔到你，嗌極都唔應。食完叫極都唔換碟，個担担麵遲遲唔來，叫侍應唔好收碗筷因為未食麵，佢睬你都傻，淨係想趕人走，等佢地做多轉。總結來說，碟頭非常細，6個小菜加麵完全掃光，勉強叫做夠食，如果有男士就一定唔夠。是日消費每人$75，唔平唔貴啦。聽講冇甜品送喎。