囍運燒臘餐廳小廚 (已結業)

行完朗豪坊嚟食咗個下午茶餐，門口貼住嗰張下午茶餐牌，入到去坐低原來係冇嘅，已經呻笨。結果我叫咗一個XO醬火鴨絲雪菜湯米粉配黑松露炒滑蛋嘅餐，啲米粉出奇地碎，顏色比較透，質地比較削，同食開嘅米粉好唔同，口感麻麻。最頂癮係我同朋友個餐都食得七七八八，淨係欠一個黑松露炒滑蛋未到。先後問過三個阿姐，第一個話等下啦，結果15分鐘過去，未到；第二個話黑松露菌賣晒，跟住就走開左，完全無理過我個餐點算，好似唔使補償返俾我咁；第三個話佢搵人嚟跟跟，結果嚟咗個大漢，佢話黑松露菌賣晒, 叫我叫過第二個餐。佢真係完全唔知自己做緊啲乜！我叫咗個餐，佢欠我啲嘢嚟唔到，竟然叫我叫過第二個餐，真係想問係咪佢請！最後我要求換過另一款炒蛋，件事至叫做解決。但服務態度咁樣，嘢食味道又好麻麻，我真係高度建議其他網友揀過第二間，以免中伏。