等咗陣有位，3檯人差唔多時間坐低，但得一檯有餐牌，唔講冇menu係完全冇諗住要俾menu嘅，然後落單個人落落下單走咗去做其他嘢。:(
嘢食方面叫咗個乾炒河同燒豬頸肉，等緊其間發覺又冇水又冇開冷氣又冇抽風一陣油煙味，問佢攞水先有。
嘢食嚟到，侍應完全唔知啲嘢係邊檯嗌嘅企喺度一臉迷茫企咗陣先開口問。
個炒河都ok正常嘅，但唔夠香，其中有一大片河粉黏埋咗冇炒開所以冇乜味。
燒豬頸肉，得面頭落咗少少調味有啲胡椒，中間啲肉冇乜味又冇汁，所以想問下佢有冇汁，等咗勁耐啲侍應行過都唔望過嚟，直到隔離檯有野食先搵到人。嗰位侍應比較醒目我哋未出聲已經話咦你個豬頸肉冇汁嘅，跟住先拎個汁嚟。噢，原來應該係有汁嘅但佢冇上到，點咗個汁好食好多。
最後埋單，見佢門口又有貼visa master octopus, 櫃檯又有貼，仲要有加一添，諗住簽credit card, 點知佢一句話唔過300蚊唔收咭，嘩咁你menu又唔寫又冇特別講，仲要收加一收齊頭收多我幾毫子(冇寫明四捨五入) ，其實如果佢服務ok我都唔介意，但咁嘅服務仲要收加一再收多幾毫子，仲要唔收咭。唔過300蚊唔收嘅就一早寫明吖，明明啲visa master貼紙大大個貼到周圍係梗係expect 可以簽咭架啦。
為免怪錯人臨走前特登行去個visa master貼紙度睇吓係咪我自己睇漏咗佢寫300蚊先收咭，事實係冇寫，只係寫住歡迎使用 We accept Visa Master‼
總括嚟講，嘢食方面ok 味道比上不足比下有餘，但服務完全唔得，大部份侍應似乎冇乜經驗唔知應該做啲乜，又唔留意樓面需要，隔離檯仲要漏咗單添。值零甚至負數嘅服務仲收加一，絕對不值。
