百樂門宴會廳 (已結業)

公司附近開咗間新酒樓，我地班為食兵團又要出動喇~門面華麗亦充滿氣派，紫白既配搭好柔和令人覺得好舒服~朝早打去訂位，難得係酒家接線都好有禮貌，一點去到就已經可以入坐！所以訂枱真係好重要，因為有好多冇訂枱既人等緊位！午市會有一ｄ套餐可選擇，但係我地決定剩係食點心！有一款佢地叫「心食流沙包」既點心，既然佢地話必食，咁我地又試下啦！淡黃色既流沙包，熱辣辣，的確做到流沙既效果，不過餡料唔夠香唔夠滑，味道普通！蝦餃又做得唔錯喎，澄皮唔算太厚，蝦肉亦爽口彈牙！唔會有好多肥豬肉係入面，感覺冇咁油膩！春卷炸得鬆脆，可惜餡料唔夠平均，我食咗三件先有一件食到蝦仁！而其餘既點心都只係不過不失，未去到高水準，但又絕對唔會難食，全部皆係不過不失之作！不得不提佢既一個小食燒腩仔，皮脆肉嫩，一定要試試呀～價錢比同區貴，但服務係同區咁多間酒樓之中最好既！既然大家既質數差不多，咁我會寧願選擇有服務同埋環境比較舒適既去幫襯啦！