鳥棲日本料理

事緣我有朋友去開呢間餐廳食晏，佢知我想同女女慶祝生日，所以大力推薦呢間餐廳比我（book檯時同職員講慶祝生日會有心太軟一個送）當晚我地一行6人準時7點半入座，我地分別點左2個2人餐同埋一啲前菜、串燒同小食咁，上菜速度都正常既，最緊要係啲食物真係好食既，重點係啲食物唔會太肥太油膩，職員服務態度係幾好，見到你無水唔使叫都會同你加，主動執走你唔要既野，同埋佢地真係好細心，小女得7歲，但當中有兩個鍋，佢地都好細心咁專登將個爐離遠小朋友，呢點真係唔係好多餐廳會留意；講返食物，基本上每一樣野都有一定水準，無乜好挑剔既，但呢個「帆立貝北海燒」同埋「原條鰻魚炒飯」呢2個真係必食
炒飯唔會太乾（有啲鰻魚汁喺度）原條肥美鰻魚鋪喺炒飯面，賣相吸引！而鰻魚肉厚肥美，每粒飯都充滿咬口👍🏻👍🏻而且我女女好怕食腥既野，平時屋企蒸魚或煎魚都唔會食，當晚佢一個人食左一大碗鰻魚飯，仲想再添食，可惜已經平均分哂6個人🤣🤣

原條鰻魚炒飯

$128

「帆立貝北海燒」原隻帶殼帆立貝，面頭上鋪滿師傅自己調教既醬，再灑上蟹籽，賣相吸引之餘，味道仲相當好，我地叫左3個，每一個都食得乾乾淨淨一滴汁醬都無剩！

呢個個人認為係必食

$92

仲有啲食物係因為小朋友們太肚餓所以影唔切，不過總括來說，呢間餐廳我絕對會再幫襯（埋單時職員會好好提醒你，如下次幫襯用OpenRice app booking 會有8折👍🏻👍🏻咁我下次黎時可以再叫多啲人試多啲唔同既野）

當晚消費

牛肉他他燒

$98

北海道陶板腸

$108

呢個係跟2人餐，有散叫