孖寶車仔麵 (已結業)

之前已經聽過荃灣有間車仔麵新開，一直都未有機會去食，今日難得同老公一齊放假，一於去食返個lunch先。一去到，已經比佢嘅裝修吸引左，好有懷舊feel，地方寬敞，坐得好舒服，我最怕一啲好迫嘅餐廳，好似想坐耐少少都唔得咁，所以孖寶確實不錯！👍食車仔麵當然要食蘿蔔豬紅啦！老公就揀左蘿蔔豬紅牛丸水魷，我就食牛腩雞腎同五香豬頸肉，仲嗌多個滷水雞翼，醬爆肉丸＆生菜墨魚條，首先係去收銀處比左錢先，跟住就可以安坐喺位等美食降臨啦！😎美食到啦！蘿蔔豬紅都好入味，又夠林，牛丸同水魷都好食，而牛腩同樣入味，五香豬頸肉好爽，雞腎簡直係我至愛！🤤而小食方面，滷水雞翼唔洗講，入晒味，超正，醬爆肉丸都好特別，咬入去勁多汁，真係好《醬爆》，而生菜墨魚條真係未食過，平時係食生菜魚肉，而轉左墨魚，成件事竟然係咁夾，墨魚肉又夠彈牙，正！今時今日要搵一間咁有heart嘅車仔麵真係好難，個個諗住車仔麵簡單易整就個個都想開間，但真正用心去煮每一個菜式又有幾多丫？我下次一定會再嚟食麵㗎！💪