滿東泰國小食 (已結業)

滿東街市有泰國菜，今日午飯外賣一個炒金邊粉，連紙包飲品$48。金邊粉賣相幾靚，有花生碎、蝦，不過配料比較少，食到中段已經冇乜嘢食，如果可以加多啲芽菜之類增加口感會較好。味道方面，有送一粒小青檸，金邊粉酸酸地，再加青檸味幾清新，調味幾好食。不過唔知係因為外賣收乾左水，定係本身係咁，金邊粉炒得非常乾，啲粉黐埋一舊，完全感覺冇油。其他餐廳食炒粉通常會覺得油膩，但係呢份完全相反，一啲油都冇。整體來講勉強合格。我喺社交平台同負責人反映，佢嘅回覆非常禮貌，話有客人之前嫌金邊粉炒得太濕，所以而家偏乾左，落單嘅時候如果想比較濕潤要同佢講聲。另外，金邊粉本身唔辣，想食辣佢可以供應辣椒粉。下次會俾多次機會，希望可以繼續支持呢間黃店。