倫哥私房菜 (已搬遷) 新店位置

之前朋友邀約佐敦倫哥, 質高抵食, 加晒分, 惟獨時段設限, 吹水聚會唔頂癮, 但香港地, 飲食業競爭慘烈, 租金, 人手, 食材, 樣樣攞命, 能夠保持質素平衡到咁精彩, 已經難能可貴.倫哥居然觀塘開多間不限時, 窩心飯竇, 馬上14人吹雞牛一飯局.先黎BB加中辣雞煲行孖咇, 濃香惹味, 雞煲三寶, 豬皮, 水魷, 牛栢葉, 拍拖更, 耳仔郁郁, 手口不停, 已經半飽, 心要追, 手要停, 後面正牛, 海鮮源源不絕, 要留肚.蠔皇扣鮮鮑亮麗登場, 滋味不凡, 只此一味, 已見功架, 心力, 緊接蒜茸蒸聖子皇, 肉脆爽, 鮮甜, 為怕食客浪費正味食材, 火鍋費勁當酒席做, 連火鍋配料蔥花, 用上師傅刀章切到靚仔薄一薄, 咁細節位都落足功夫, 滾動.邊邊時間, 肉蟹海鮮鍋, 強勢開路, 正牛, 海鮮, 兩大天皇, 芧得輸, 鮮牛頸脊, 甘香, 牛味濃, 海鮮盤霸氣, 料鮮, 款足, 量足, 大滿足.食材精彩, 服務亦貼心難忘, 個個美女, 帥哥, 隨和, 親切, 服務到位, 對比坊間大部份貼錢買難受, 黑面, 一肚氣經驗, 足見倫哥厚待伙計, 強將手下無弱兵.聽價錢覺貴, 食過就知低,