漁吉海鮮丼專門店 (已搬遷) 新店位置

收工特登搭巴士黎九龍城食呢間出名大份又足料嘅海鮮丼。呢間漁吉位置距離太子道東巴士站只需要3分鐘，係正街角，裝修又突出，所以一定唔會行過龍。呢度係典型日式木系裝修，牆上有壁畫，座位都幾多架。餐牌上最吸引我地係漁吉特選丼（$198），勝在包羅萬有，除左玉子，仲有11種魚生！主流嘅魚生，好似三文魚、油甘魚、赤蝦、赤身、左口魚邊、帆立貝、海膽都有！竟然仲有比較少見嘅星鰻，好薄身，好長一條，味道似鰻魚。呢度魚生夠新鮮，咁足料嘅丼絕對滿足曬我地～另外呢度新推出松葉蟹三味丼（$238），有三條剝殼嘅松葉蟹腳，仲有大量蟹肉，同埋混有蟹膏嘅蟹肉，當然唔少得蟹籽！蟹控啱曬！原來蟹膏加蟹肉係咁正，味道依然好濃，撈飯啱曬！小食方面點左蒲燒鰻魚（$88），切開有四大件。係肉質比較硬身嘅鰻魚，調味剛好唔會過鹹！呢度有一大壺面豉湯，用平時啲茶壺裝，唔講都唔知係湯！原來免費任飲！要大力搖，先倒到面豉出黎。鹹度剛好，搞到我地飲完又飲停不了！