西關老祖 (文苑樓) (已結業)

朋友介紹我黎依間非常適合外賣嘅小店，小店走懷舊加新派風，裝潢簡簡單單。  極黑●黯然銷魂飯：叉燒半肥瘦，煎得香口，肥肉同瘦肉一層搭一層，令口感升華咗唔少。而且每塊都有番咁上下厚度，非常足料。上面仲鋪咗煎雙蛋，白飯淋有醬汁，配搭一齊食唔會覺得單調。 西關瀨粉：第一次食依種瀨粉，有啲似狗仔粉但又唔係，瀨粉稠密，麵條滑嘟嘟。加入冬菇等等嘅配料烹調，令瀨粉更香。重點係豬油渣！一 定要加埋入去一齊食。 炸●黑毛豬肉粽：第一次食炸粽，仲要係第一次食用黑毛豬整嘅粽。完全唔覺得油膩，而且炸得夠乾，呈金黃色，外層仲帶有少少焦脆。糯米口感煙韌，用上黑毛豬就更健康，炸完肉質都冇受影響。餐廳事先將炸粽切件，方便食用，而且橫切面好靚好分明，見到金黃嘅糯米包住一大件黑毛豬肉。 臭草綠豆沙飲品：係夏天飲就最適合喇~ 綠豆沙清熱解毒，加入臭草可以消暑、去濕，大熱天時最好叫番一杯。而且好足料，綠豆超多，啖啖都飲到，眼見都佔滿樽嘅一半有多添，所以一定要拌勻飲用。