鼎記 (已結業)

今晚收工嚟旺角做facial，經過「鼎記」食埋個晚飯先。餐廳裝修簡潔新穎、夠光猛，環境乾淨企理，坐位又夠闊落，食得好放心。見餐牌有唔同種類野食，好似中式小菜、燒味、車仔麵、懷舊小食等...招牌菜係以燒味為主，見到啲燒鴨，燒肉，油雞等等賣相都唔錯。最終我叫左個叉燒乳鴿飯。乳鴿因為係落單先即燒嘅，整得外脆內軟、皮薄又無乜油，肉汁仲保留住，好味道！另外叉燒個蜜汁都好食，味道甜甜地、肥瘦適中。今日嘅例湯係蓮藕湯，真材實料，冇味精，幾清甜。我最欣賞係呢度嘅侍應同啲食客有傾有講，多左份人情味！