熨烤達人 (已結業)

好耐冇食過韓燒啦！今日決定同朋友去食下依間韓燒，見佢有幾間分店應該唔錯。餐廳都幾闊落，有d得意嘅graphics. 店員首先會上配菜，有辣大豆、芝士、粟米同泡菜。店員喺烤爐嘅邊邊淋上蛋漿後，就可以放材料入去。烤肉方面，我地點咗推介嘅磚頭五花肉($138)同調味牛排肉($88)。好好嘅係店員會幫你烤埋同幫你留意火喉。話明係燙烤達人，店員將肉放上烤爐後，會用熨斗壓着五花腩，令五花腩可以烤得均勻。而且店員會幫你剪埋肉。原本我以為五花腩會好肥，但呢個磚頭五花腩燒完之後脂肪層唔算好肥，少量脂肪層再加肉令五花腩食落唔係好硬。外層微微烤焦，但肉汁仍然鎖住喺肉入面。調味牛排肉分量唔多，脂肪分布平均，比磚頭五花腩更軟身，燒起後牛肉香氣四溢。用生菜包住燒肉會冇咁肥膩，生菜新鮮。金仔炸雞飯($88)份量超大！有六件大雞件，兩個人分都食唔哂。店員會淋上忌廉汁。初初都驚會好濟，但個忌廉汁唔算好heavy. 餐廳以凍飲居多，有酒精類可以chill下。但小妹飲唔到凍飲就剩返柚子蜜($28)可以揀。還好唔會太甜。