安安燒 (鯉景大廈) (已結業)

平時鍾意同一大班朋友到處覓食, 今日朋友介紹去到筲箕灣試下呢間串燒店. 位於南安街, 樂融軒個條街向西灣河方向行3分鐘左右 ,舖頭中型Size, 但D位算係幾闊落, 而且有戶外位置可以坐.我地今日四個人選擇咗坐室內. 呢間串燒店雖然唔大但食物種類出奇地多, 而且竟然有我最愛的手工啤酒! 啤酒同串燒一向都係絕配, 有手工啤酒就更加perfect!我叫咗支日本手工黑啤COEDO, 呢隻啤酒帶香濃可可味, 平時就咁飲會略嫌苦. 但如果襯濃味肉類串燒就會好夾. 所以今日主打肉類.個人好欣賞呢度D燒肉夠火喉但亦都可以保留到肉汁. 夠火喉係指佢燒到有少少炭香味, 面頭有有少少焦黑效果, 但最緊要唔好過火, 因為燒太過份會令到肉類水份流失. 但如果唔夠火喉就會唔熟. 所以控制火喉真係好重要. 其中烤雞腿肉串, 安格斯肉眼牛柳串, 雞中翼, 牛小排同埋燒牛舌都係做得好好. 安格斯肉眼牛柳串, 牛小排咬落外層香脆裏面肉質鮮嫰; 燒牛舌就好嫰滑同酥味十足; 雞中翼D肉就醃得好夠味, 而且個皮燒得好香.店仔細細睇落雖然唔起眼, 但食物質素認真唔錯! 下次會再幫襯