達順辣蟹火鍋 (已易手) 新餐厅

嚟到呢度梗係食蟹啦，佢哋喺海鮮嘅食材上面有一定嘅品質，因為可能係每日都供應嘅原因，所以啲海鮮都比較新鮮，佢哋個打邊爐真係好抵，湯底亦都好好味，我哋揀咗辣蟹鍋湯底，一嚟到個鍋就見到有一隻都夠大嘅蟹喺裏面，二湯底亦都望得出好濃郁有啲辣椒絲，等佢滾左一段時間之後我哋先食蟹，即係都幾多肉，肉質都幾鮮嫩，辣辣哋好惹味，湯底裏面亦都有少少配菜，例如冬瓜，枝竹，估唔到原來冬瓜咁樣食都幾好食，幾入味，枝竹就要煲耐少少等佢比較軟身入口就會好啲，食完隻蟹之後就可以叫啲打邊爐嘅餸，首先當然要個手切肥牛啦，牛肉好鮮嫩，肉質好有口感，幾好味，之後不得不讚就係個墨魚滑，應該係佢哋自家製，因為裏便清晰見到好多一粒粒嘅墨魚肉喺裏面，入口亦都好好味，同出邊嘅鋪頭完全唔同，呢個墨魚滑值得一讚，然後就係金菇菜，滑豆腐，個豆腐真係滑到不得了，亦都好香豆腐味，份量都多，之後就係叫多個海鮮海蝦，佢哋係新鮮鬧啲下出嚟再預備好後就俾我哋，所以食落去肉質好彈牙，好新鮮，整體講到佢嘅打邊爐，呢間都算係好抵同埋好好食，可以encore，不錯不錯。