1
前菜: 泰式鳳爪沙律、炸蝦餅
鳳爪份量都幾多，質感夠爽彈，不過最重要係個泰式醬汁調得好好，唔會過辣或過酸，配埋香茅、洋蔥、番茄仔同紅蘿蔔絲做配菜，食落去會更加Fresh。
炸蝦餅都算大舊，食落去熱辣辣，外脆內軟，點配泰式辣醬更加開胃。
主菜: 泰式椒鹽脆腩肉
一上枱真係俾佢嚇左一嚇，啲脆腩肉好似多到成坐山咁高。平時有食過泰式燒肉，但用中式椒鹽fusion的做法真係第一次試。呢度用的配料都好多，我真係認真數過，有椒鹽、洋蔥、炸蒜、蒜頭、香茅、紅椒、青椒、辣椒乾同埋炸腰果，真係超有誠意，所以食落去啲腩肉都夠入味香口。不過重點係脆腩肉頂層的豬皮，一咬落去首先係香脆而有種空氣感，之後內裏爆出豬油的味道，基本上係令你食唔停口。
麵食: 香葉牛肉碎煎蛋飯
香葉肉碎煎蛋飯就成日食，但用牛肉粒黎整又真係第一次。牛肉粒餣得好好，加上黑椒同埋九層塔，充滿泰式風味。另外仲用蠔油調味，配上蛋汁係超好餸飯。另外牛肉切粒有咬口，唔係用免治牛肉。
甜品: 香焦煎餅
香焦煎餅即叫即做，香蕉同煎餅的配搭一定夾，加埋煉奶後味道層次上更加吸引!
總括黎講，二人餐食完都好飽，仲要包兩杯飲品，最重要係餸菜裏面見得出佢地有心去做，同時亦有創新的菜式，當中泰式椒鹽脆腩肉真係令我感到好驚喜。另外呢度的音樂係播香港流行曲，一路食一路聽，令我有種莫名舒暢的親切感。
