喺呢度食晏就食得多喇，今日一行三人嚟食吓晚餐先。我哋6:00嚟到，時間尚早，所以可以揀個靚位坐。餐廳光猛企理，係適合同朋友傾偈嘅地方。
金沙炸魚皮（$68）：新鮮熱辣咁上枱。本身諗住鹹蛋黃醬比較漏，唔會食得晒，點知唔覺唔覺原來好快就食完。魚皮薄，脆。鹹蛋黃醬惹味。
蝦多士（$135有3件）：多士炸得好脆，食落short short聲。多士夾埋隻鮮蝦一齊食，口感豐富（軟，彈，脆）
蜜餞金蠔（$180有3件）：個人覺得金蠔用蜜餞嚟整係最夾。金蠔蠔味濃郁。配上甜甜地嘅蜜餞，令味道層次提升。
生煎鹹魚肉餅（$118有6件）拼荷葉包（$28有4個）：呢個必食！鹹魚味重，聞到都流口水。肉餅彈牙多肉汁，表面煎到脆脆地。配埋軟熟嘅荷葉包一齊食，平衡返鹹魚嘅鹹味。
椒鹽黃花魚仔（$188有6條）：呢個好抵食。每條黃花魚仔都好新鮮嫩滑。魚仔炸得香脆，所以就算佢有啲骨仔其實都脆到可以咬碎到，唔怕哽到碎骨仔。
冰梅骨（$118）：味道酸酸甜甜，幾開胃。骨嘅質量好，口感彈牙。
炸芝麻流沙湯圓：芝麻餡好流心呀！正！不過大家食嘅時候要小心啲，哈哈.
南瓜芋頭糖水：糖水煲嘅時間夠，材料入口即溶。味道清甜。
呢度啲侍應服務態度好好，好有人情味。所以間唔中就會嚟幫襯吓。
