星期六下午一點半前到達，當時餐廳有唔少食客😯。不過在場職員唔夠，要比D心機先搵到職員落柯打😂。另外，上菜速度幾慢，我地叫左5樣野，基本上食完上一道菜等一陣先嚟下一道😶
四季薄餅 $188
芝士唔多，茄醬幾酸，火腿正常，餅皮焗到偏乾硬，我個人麻麻地呢款PIZZA。
美國厚切極黑豬鞍扒 $268
呢塊豬鞍扒有厚度，但真係好細塊😂 好彩有半價。肉質鬆軟又有肉汁，配埋佢上面個甜甜地、好似蜜糖芥未味嘅醬，連唔中意食豬嘅妹妹都讚好味😋。
堂煮卡邦尼意粉 $198
我本身對呢個意粉充滿期待，因為好多食評都讚好!! 點知最令我失望就係佢😥 煮法唔正宗，意粉加入大量淡忌廉煮，之後加入蛋黃煮一陣後，倒到巨型芝士中攪兩下就上碟。忌廉汁收得唔夠，仲係水旺旺；淡忌廉無奶香，加上調味唔夠，無煙肉粒嘅位好淡味，再者芝士只係攪左兩下，根本食唔出芝香。
紐西蘭羊架4支 $368
叫左五成熟，師傅都做到；羊架肉唔多，少少羊羶味，唔會好難接受。
法國鵝肝拼牛柳餐 $298
1
三文魚撻撻一般，反而隔離個沙律蛋撻撻好味D。
龍蝦湯要提職員先送上，味道一般，帶點海鮮腥。
五成熟牛柳肉質軟淋又Juicy，係差D牛香；鵝肝算厚而且好油，唯一缺點無煎到表面香脆。
朱古力心太軟 跟餐+$20
呢個甜品真心醜樣，但味道唔差；唯一係中間太流心，個人覺得可以杰番少少。
食物份量偏細、味道一般；裝修幾舊，似高級茶餐廳；而且冷氣唔夠，室內有少少悶熱感；加上職員唔夠、上菜慢等問題，所以整體用餐感覺一般😐。
