桻之燒 (已結業)

放假同朋友出去食晏順便行下東大街，見到呢間餐廳裝修好有日本風而且有位，就行入去試下。餐廳細細但都唔會坐得好迫。牆上面有好多牌寫住推介嘅食物。午餐有好多選擇，我哋每人要咗一份一齊分享。蒲燒珍寶鰻魚飯($98)全條鰻魚好壯觀，不過略嫌啲汁太多有啲咸。如果 燒一燒脆個鰻魚皮同埋有少少配菜就更好喇。招牌串燒拼盤A($98)燒雞翼好香，金菇肥牛卷足料，牛肉唔算太肥。六花腩燒得比較乾鞋。最好味係紫蕃薯蓉，夠熱又香又滑又唔會太甜。招牌串燒拼盤B($88)荔枝拼煙肉一向係我最愛，鹹香配清甜係一絕。豆腐香脆不過不失。蕃薯仔個皮唔夠脆燒得唔夠。旁邊有啲沙律同燒露筍，如果係男士叫呢碟一定唔夠飽。