Applegreen (已結業)

離開商場一期核心食肆區揾食，涼住冷氣行遠啲，去到第一座嗰頭、niko and......旁邊落電樓梯，到達終點。周六周日的Brunch Menu有餐湯、沙律、迷你牛角包、主菜同飲品  ( 指定凍飲免加錢 ）。沙律係開心大發現，有「超級食物」羽衣甘藍同埋紅石榴！份量唔多，但已經攞晒印象分，不過見到好多人都冇食，好可惜呀。識得話人做大嘥鬼，自己都食唔晒件蜜糖炭燒豬扒。豬扒的肉太實、好硬兼唔入味，用扒刀切開佢都要出盡全力，份量細細的配菜紅蘿蔔、南瓜同炸薯條就清晒。松露野菌意大利燴飯有菌香，凍得快，可能同用咗不鏽鋼碟有關，味略淡，飯軟身咗少少。如果一個人食會好飽肚。另外，畀咖啡友的建議：請揀選咖啡以外的其他飲品。用餐期間，持續有五、六枱客在門外等位，店員人手明顯不足，忙到執唔切枱。欣賞佢地努力埋頭苦幹去做，招呼有禮。